Dimenge passat, lo jornalista catalan Jordi Évole faguèt una entrevista d’Arnaldo Otegi per la cadena de television espanhòla La Sexta. Al delà dels insultes e de las menaças qu’a recebut lo jornalista dins lo mai pur estil de la drecha espanholista, l’entrevista desvelèt d’informacions estonantas e quitament espantantas, qu’entre elas volèm soslinhar la mesa en evidéncia de las torturas.
 
Mentre que se debanava l’entrevista, lo jornalista mostrèt lo testimoniatge de Txema Herzog, un èx-conselhièr del Partit Popular d’Errenteria (Bascoat). L’elegit explica qu’assistiguèt a una conferéncia de Pili Zabala, sòrre de José Ignacio Zabala, un dels joves militants d’ÈTA sequestrats, torturats e assassinats pel GAL. “I anèri perque me sentissi tanben près d’ela. En aqueste país s’es practicat la banhadoira, lo sac, los electròdes...”, çò ditz, en mençonant diferents metòdes de tortura practicats en Espanha dins los centres de detencion. Herzog conclutz en afirmant: “aicí i a agut de torturas, degun o pòt pas negar”.
 
Puèi, a prepaus d’aquel testimoniatge, Otegi diguèt: “A ieu m’o faguèron çò dels electròdes, personalament. Aquesta persona merita lo respècte car abòrda la situacion amb una perspectiva fòrça constructiva. Sabi qu’aquò li a portat de problèmas dins son partit.”